第五次與Midwife見面 - 飲糖水

日期 : 2016年2月4號

準時09:30亞太就去到兒童中心, Midwife好快手就幫亞太抽血, 之後就為亞太炮製左一柸美味嘅糖水, 好在亞太之前巡Blog睇過某D準媽媽分享有關飲糖水嘅經驗, 原來飲用此類糖水係要慢慢嘆, 如一開始就一口氣飲晒落肚出現反胃現象, 咁就恭喜喇又要呆坐兩粒鐘後再嘆多柸美味糖水.

亞太向來唔好甜嘅食品&飲料, 所以亞太唔可以畀自己有第二次機會品嚐此類糖水, Midwife好快手就炮製好柸糖水佢仲請亞太係佢面前乖乖咁品嚐, Midwife話曾經有孕婦出貓飲一半倒一半, 自此之後佢地就杜絕考生出貓嘅機會, 唯一解決辦法就係要考生係Midwife面前飲完柸糖水, 先至再安排呆坐兩粒鐘作為獎勵@_@ @_@ @_@

難得一生人有一次機會飲用此類糖水, 亞太本想影張相留為紀念, 不過有Midwife係度亞太又唔好意思, 講番柸糖水唔好甜嘅亞太真係覺得柸嘢勁甜, 勁甜同勁甜, 此柸糖水真係好難啃落肚子, 不過好難都要啃落去否則辛苦嘅係自己.

亞太慢慢分左幾好次嘆呢柸美味糖水, 好彩飲完後都冇出現反胃作嘔現象, 否則坐兩粒鐘後又要再嚟一次, 到時亞太真係會暈低呀!!! 飲完糖水後亞太被安排呆坐係一間房, 百無聊賴嘅亞太唯有上網睇下新聞打發時間.

終於都捱完呆坐嘅兩粒鐘, Midwife又幫亞太抽多一次血, 兩日後就會有報告如有問題會即時以電話通知亞太, 冇任何電話就即係好消息一切正常, 亞太當然唔希望會接到任何電話通知喇!!! 為左飲一柸糖水搞左一個上晝終於都可以離開兒童中心.

謝過老天爺嘆完果柸超級糖水後, 亞太都冇收過任何電話通知, 即係話亞太考試已過關喇>_< >_< >_<.