公佈消息... ... 同時又收到一個好消息

日期 : 2015年10月26號

亞太一早收到郵差叔叔派來嘅一疊信件, 其中一封係由醫院寄畀亞太嘅報告, 亞太即刻將信件拆開睇有關報告結果, 謝過老天爺亞太份報告超靚仔, "小猴B"各樣測試都冇問題冇任何隱疾, 即係話一切正常順利平安, 既然係一個好消息亞太都應該盡快通知奶奶同亞太個亞爹喇!!!

亞爹知道就快又做外公當然係好開心喇!!! 千叮萬囑亞太一切要小心保養身體唔好太操勞, 亞爹嘅說話真係令亞太感到好窩心呀!!! 至於夫家因為屬大家庭所以我哋一向用WhatsApp群組同大家聯繫.

當亞太係群組公佈老蚌生珠一事後. 當然好快收到各人祝賀嘅回應, 之後亞太又收到一個驚訝嘅喜訊, 就係狂躁先生個弟婦同亞太一樣懷有身孕, 大家可能會問亞太點解要用"驚訝"呢兩個字嚟形容嬸仔懷孕一事呢???

亞太係時候又要同大家講個故仔喇!!! 一個亞太覺得唔可以解釋嘅故仔, 事原嬸仔係2009年某月某日公佈懷有"小虎B", 亞太收到呢個消息後冇耐就發現有左"撥Boot豬", 嬸仔係2010年6月份就生左個"小虎B女", 同年嘅9月份亞太就生"撥Boot豬".

嬸仔係2011年某月某日又再次公佈懷有"小龍B", 亞太係收到呢個消息後冇耐, 都驚訝自己同嬸仔一樣懷有"小龍B", 嬸仔係2012年7月份就生左個"小龍B女", 同年9月份亞太就生左"小龍B", 今次亞太公佈老蚌生珠一事後, 就收到嬸仔同亞太一樣懷有"小猴B"嘅消息.

本以為今次亞太會生先過嬸仔, 點知嬸仔嘅預產期畀亞太早, 即係嬸仔會生"小猴B"快過亞太, 亞太都唔能夠用常理去解釋, 究竟係咁啱遇上剛剛??? 定係天意呢??? 亞太都唔知道亦都解釋唔倒, 因為呢樣嘢唔係亞太嘅能力控制範圍內.

不過口多多嘅狂躁先生就話有冇咁邪呀??? 約都唔會咁啱喇次次都同嬸仔懷同一年份嘅BB, 而且每次都係嬸仔生先過亞太, 不過亞太都係果句有好多人同事都唔係亞太嘅控制範圍內, 亞太只能講呢D可能係天意係老天爺嘅安排.

既然係老天爺嘅安排亞太除左感恩之外, 當下嘅就係希望自己同嬸仔都能健康順利平安直至誕下精靈可愛嘅"小猴B".