小寶寶的出現&離開

2009年6月中嘅時候亞太以為"M小姐"如常探訪, 當時"M小姐"嘅探訪同平日有D唔同, 流量唔多色澤情現係淺啡色探訪時間超過10日, 亞太都覺得有D唔妥狂躁先生就叫亞太搵枝棒棒驗下, 點知亞太發現棒棒顯示係懷孕.

真係"大檸樂"喇原來唔係"M小姐"到訪係見紅呀, 嚇得亞太半死"拿拿淋"打電話畀家庭醫生, 由於因為見紅家庭醫生安排亞太去大醫院, 其中一個婦科部門叫(EPAU), 呢個(EPAU)專接見啱啱懷孕而有問題嘅孕婦.

亞太就因見紅所以需轉到(EPAU)呢個婦科部門, 自從被轉到(EPAU)後亞太嘅見紅現象一直都冇好轉, 而且之後嘅情況就變得越嚟越差, 亞太不停被抽血驗(hCG)指數, 雖然(hCG)指數係有升但係又唔理想.

之後嘅情況唔只見紅仲出現血塊, 係7月3號晚情況轉差而需入急症, 經過一晚觀察4號經醫生批准出院, 5號瞓醒後又大量出血仲夾雜血塊同一D不能形容嘅嘢, 最後又再次被送入婦科病房, 觀察兩日後又經醫生批准出院.

出院後又繼續番(EPAU)檢查同跟進, 醫生一直都為亞太抽血驗(hCG)指數, 但呢個指數一直都唔理想, 最後一次"M小姐"探訪亞太係五月份, 七月八號醫生同亞太照超聲波不過乜都照唔倒, 醫生提議亞太照陰超, 原本亞太唔想不過當時係唯一辦法, 不過照出嚟嘅結果令亞太非常之沮喪.

由發現有左小寶寶後亞太非常之努力, 用盡所有辦法想保住腹中塊肉, 不過無論亞太幾努力去嘗試爭取, 到最後都唔係亞太嘅能力控制範圍內, 經過超過10日嘅(hCG)檢驗, 亞太嘅指數一直都唔達標, 加上見紅出血嘅情況有小小改善.

原本亞太以為情況好轉點知換嚟一個令亞太傷心得要死嘅結果, 7月19號亞太再次被安排照超聲波結果依然係乜都照唔倒, 但係驗尿報告顯示亞太係懷孕, (hCG)指數有升不過係唔正常數字, 面對以上檢驗結果亞太當時都好無奈傷心當然終日以淚洗臉, (亞太係因經歷過人生中首次嘅痛苦經歷後, 先至深深體會有好多人同事都唔係自己嘅能力控制範圍內, 從痛苦中先學識做人要積極, 正面, 活在當下).

7月20號亞太番(EPAU)見一位高級顧問醫生, 呢位醫生好詳細同亞太解釋見面嘅原因, 首先醫生肯定亞太並唔係宮外孕, 至於出血嘅原因係本身個胎兒出現問題, 係屬於一個唔健康嘅胎兒, 所以一開始就見紅出血.

醫生亦都肯定胎兒已經自然剝落連同血塊&亞太曾經講過一D形容唔倒嘅嘢排出體外, 因有部份胎兒組織未能完全排出體外, 所以驗尿報告依然顯示亞太懷孕, (hCG)指數有升但係唔理想唔達標, 醫生同亞太講 : 亞乜太太非常之抱歉妳已被確定小產.

亞太當時聽見醫生呢個殘酷嘅消息, 整個人都被推進瘋癲崩潰嘅狀態, 醜態盡露於人前失控狂喊, 在場嘅醫生同護士冇加意阻止安慰, 佢哋畀時間亞太去發洩情緒, 因為係當時亞太所承受嘅痛苦同壓力都唔小, 醫生怕亞太見完婦產科後又需轉介到精神科.

亞太瘋癲過後情緒開始平靜落嚟, 醫生就同亞太講以下嘅說話 :

亞乜太太我知呢個係一個好難接受嘅消息, 不過事情已經發生左唔可能改變, 家陣要盡快幫妳將殘餘嘅胎兒組織排出體外, 由於只有小量部份組織所以唔需要做吸盤手術攞走胎兒組織, 醫生建議亞太注射一枝針藥(MTX), 打左呢枝針後亞太就會好似"M小姐"到訪一樣, 而殘餘胎兒組織會從血液中自然排出體外.

醫生話呢個辦法係最好而且對亞太嘅身體冇咁傷, 打左呢枝針後要不停抽血做測試, 直至確定所有殘餘胎兒組織自然排出體外唯止, 而且注射(MTX)後半年內都唔可以再懷孕, 醫生叫亞太盡快決定簽同意書, 因枝(MTX)針係由醫生負責注射需要時間作出安排.

亞太當時都別無他選只有無奈簽上同意書, 呢位高級顧問醫生好快手就為亞太作出安排, 注射針藥時間係翌日7月21號 12:45p.m., 係離開會見室前呢位高級顧問醫生再次問亞太仲有冇其他問題, 係米清楚知道有關(MTX)注射後嘅事宜, 亞太當時無奈回答清楚知道, 亦都承諾會準時出現接受針藥注射, 亞太之後拖著疲憊勞累嘅身軀準備離開, 突然亞太再次聽見呢位高級顧問醫生一句簡單實在嘅說話, 亞乜太太無論發生乜嘢事 the life must go on!!!

就係呢句簡單實在嘅說話令亞太開始清醒, 冇錯每個人都有唔同嘅經歷際遇, 不論所有受嘅打擊, 痛苦, 傷害有幾深, 時間永遠都向前走地球亦不段轉, 絕唔會因某個人嘅傷痛而有所改變, 小寶寶嘅離開已經係鐵一般嘅事實, 亞太唔可以用個傷痛嘅框架框住自己, 始終亞太仲有個家有個好老公有個女要照顧.

亞太唔係神雖知道理實在所在但係亦需要時間去治療等傷口埋合, 2009年7月21號12:45p.m.亞太接受(MTX)注射後就正適同小寶寶講再見, 雖然亞太唔知道小寶寶係仔定女, 究竟懷有小寶寶幾多個星期, 但有一樣嘢係可以肯定小寶寶曾經係亞太個肚子出現過, 雖然小寶寶已確定離開亞太, 不過亞太相信老天爺已經為小寶寶作出最好嘅安排, 而亞太亦唔會忘記生命中曾經出現過呢個小寶寶, 亞太亦唔會忘記2009年7月21號12:45p.m.人生最傷痛嘅一刻.

事隔6年亞太家陣需擁有小公主, 撥Boot豬&小龍B, 不過亞太都冇忘記過小寶寶, 當亞太瞓唔著夜瀾人靜嘅時候, 亞太就會特別想念記掛小竇寶, 小寶寶曾經都擁有過寶貴嘅生命永遠都係亞太個好孩兒, 小寶寶媽媽永遠懷念你/妳.