亞太被取笑為千億新抱

日期 : 2015年12月13號

12月13號係中文學校搞聖誕聯歡嘅大日子, 一如以往各個家長都會整D美食出席參加呢個聖誕聯歡嘅日子, 有得食有得玩又有獎抽小朋友當然就最開心不過, 亞太準備左兩款甜品帶埋"撥Boot豬"同"小龍B"一齊參加呢個聯歡活動.

場內都有另外兩位家長好似亞太咁懷有身孕, 雖然亞太嘅懷孕期已經過左一半, 但係個肚又唔係太明顯, 霎眼睇落就好似多左個肚腩一樣, 大家就好似發現新大陸一樣, 有好多家長老師都走到亞太身邊七嘴八舌咁問 : 亞太妳係米有左呀??? 妳有左幾耐呀??? 係仔定女呀??? 幾時生呀??? 點解唔聽妳講話有左呀???

老實講亞太其實都唔係好想答佢哋, 因為亞太覺得呢個係亞太嘅私人事, 唔需要敲鑼打鼓四圍唱, 不過基於禮貌唔答唔得, 大家知道亞太懷個男寶寶後, 就取笑亞太好似千億新抱咁, 查實亞太當時都覺得自己好鬼尷尬, 因為畀一大堆人圍住指指點點, 亞太知道有某D人係出自真心去關心亞太, 但亦有部份人係出自八卦心態嚟趁熱鬧.

亞太冇徐小姐咁幸福嫁個有錢人, 有個擁有雄厚家財嘅老爺, 不過講真亞太唔會妒嫉羨慕, 俗語有句說話 : 落地喊三聲好醜命生成, 當下亞太覺得自己好幸福滿足, 有個愛鍚關心自己嘅老公, 擁有三個精靈活潑頑皮嘅小朋友, 承蒙老天爺嘅厚愛眷顧腹中懷有一個"小猴B".

今天亞太得到嘅已經係比上不足比下有餘, 亞太唔係一個貪心嘅人能擁有就要珍惜感恩, 正如之前亞太都講過此刻乎復何求!!! 每個人嘅價值觀都唔同有人力爭上游, 有人選擇平靜安穩, 亞太選擇做後者做一個滿足感恩嘅快活人.

不過自聖誕聯歡會後直到今日都仲有部份家長繼續取笑亞太為千億新抱, XYZ... XYZ... 真係吹Q賬呀!!!