懷有小猴B感受

亞太想分享一下有左"小猴B"嘅感受, 最初用棒棒發現有左當然係半信半疑, 直至(母乳)停止生產妊娠反應跑埋出嚟, 亞太都知道就算未同Midwife見面, 肚中已經有一個小生命一日一日咁陪伴亞太一同生長, 亞太唔呃大家亞太的確有一刻低落嘅情緒心情.

之前有睇開亞太個Blog嘅朋友仔都知道, 一直都係得狂躁先生一個人搵錢, 而亞太只係幫人湊下小朋友, 做蛋糕, 甜品等小工作幫補生計, 原本"小龍B"今年九月份就正式入學, 亞太就可以去搵多份兼職幫補生計, 就因"小猴B"嘅出現最終都打唔響個如意算盤.

一個人搵錢幾個人食飯, 小姐們開始長大額外嘅學習費用亦都多左, 再加添加一個"小猴B"開支又會大左, 原本諗住有機會搵多份兼職幫補生計, 點知反而係有出冇入, 亞太突然為左家庭嘅開支好煩惱同情緒低落.

亞太好清楚知道有好多人同事都唔係自己嘅能力控制範圍內, 既然老天爺為亞太有咁嘅安排一定有老天爺嘅旨意, 加上亞太巡Blog見過某D夫婦分享為求一子半女, 花盡心思(IVF)金錢時間 最後都係中空寶.

他們所受嘅壓力真係唔小, 而女性所受嘅痛苦亦非想像般嘅容易, 什麼抽卵, 放胎, 打針, 食藥, 做一個IVF嘅程序夫婦二人所受嘅壓力, 係亞太同大家都冇辦法感受到, 而最重要係每次所抱嘅希望最後都變為炮影, 果種無奈失落嘅心情相信只有當時人先至體會到有幾傷痛.

亞太唔係想講風涼話(絕對肯定冇幸災樂禍嘅意思), 亞太既然承蒙老天爺嘅厚愛同眷顧, 唔需要花上一分錢, 時間, 痛苦, 壓力等等... ... 肚中就有多個小生命, 當下就要好好珍惜同感恩, 至於日後嘅生活開支亦都唔需要刻意煩惱憂心.

亞太相信老天爺會為狂躁之家好好安排, 加上俗語有句話船到橋頭自然直, 既然有咁多人同事都唔係自己能力控制嘅範圍內, 唯一可做嘅事就係積極正面生活好好活在當下, 所以亞太當下就要好好保重身體, 希望"小猴B"健康平安生長.

亞太藉著呢個機會再次感謝老天爺嘅厚愛同眷顧, 亦都衷心祝福等待小生命嘅夫婦們, 只要積極正面活在當下 Dream come true. 努力, 加油!!!