吓!!! 亞太要照第三次超聲波

日期 : 2015年12月11號

係12月11號亞太又收到郵差叔叔嘅一疊來信, 其中一封係由大醫院寄畀亞太嘅, 當時亞太都覺得奇怪點解又收到大醫院嘅信呢??? 亞太"拿拿淋"拆左封信嚟睇!!! 信嘅內容係再次邀請亞太係2016年3月1號再到大醫院照超聲波.

一般健康正常嘅孕婦只會由Midwife跟進檢查, 而且只有照2次超聲波嘅機會, 即係話唔見婦科醫生, 冇機會照第三次超聲波就係一件好事, 但係點解亞太"無喇喇"又要照第三次超聲波呢???

亞太記得係12月8號照第二次超聲波嘅時候, 護士曾經講過亞太個胎盤位置比較低, 當時亞太都問咁係米好大問題呢??? 不過護士姐姐嘅回答係應該可以問題唔大, 亞太聽見問題唔大都鬆左一口氣, 但係點解又安排亞太照第三次超聲波喎!!!

狂躁先生叫亞太唔好自己嚇自己, 可能只係程序上嘅需要, 老公話如果係有乜唔妥亞太已經一早安排要見婦科醫生或顧問, 狂躁先生叫亞太下次見Midwife嘅時候, 就知會Midwife要照第三次超聲波嘅事, 睇下Midwife有乜嘢專業意見喎.