豉汁鳳爪

鳳爪呢款點心係我狂躁靚太嘅精選之一, 亦都可以講係由細食到大嘅點心, 不論係邊間酒樓同任何人茶聚亞太我都會揀鳳爪呢款點心, 不過老實講就唔係間間酒樓都做得好食, 特別係身在異鄉嘅亞太, 幸運地我住呢個埠仔嘅點心同價錢都泊得住香港嘅水準, 一碟豉汁蒸鳳爪承惠€3.30個大洋, 講真一碟都唔夠我家小姐們攝牙罅.

想小姐們食得開心又滿足唯一方法米就係, 亞太我自己係個狂躁廚房度自己整囉, 不過當我自己整個一次之後, 從此亞太我都冇再係茶聚嘅時候揀鳳爪呢款點心喇, 原來自己郁手整係可以好食咁多呀!!!

就等亞太同大家分享豉汁鳳爪嘅做法喇!

由於亞太住嘅地方冇現成鳳爪買呀! 所以做呢個點心都要花D時間, 首先我要買D雞腳番嚟清洗乾淨切去腳趾, 然後就要落鑊炸雞腳, 炸好嘅雞腳再放入加有麥芽糖嘅滾水倒"霎腍"D雞腳, 為免麻煩大家當然可以買現成嘅鳳爪就可以慳番唔小嘅功夫.

材料 : 鳳爪 / 蒜頭 / 豆豉 / 薑

調味料 : 水 / 生抽 / 老抽 / 蠔油 / 雞粉 / 糖 / 酒

蒜頭豆豉剁成蓉 / 薑切片

涷鑊涷油加入薑片中慢火將薑片爆香

加入蒜豆豉蓉同鳳爪炒勻

略炒一陣後係鑊邊加入適量嘅酒再炒

之後就加入以上嘅調味料蓋上鑊蓋, 以中火煮至理想收汁杰度就可以上碟

美味豉汁鳳爪就完成喇

P.S. 中意食辣嘅可以加入辣椒仔或豆瓣醬同炒 / 多數係酒樓食嘅鳳爪都係蒸嘅不過亞太我就中意呢個方法煮, 可能D鳳爪都係自已整所以即使煮完都唔會好腍仲好好食呀!