自製鴨腎

生活在異鄉即使銀包有錢想食碗雲吞麵都唔係一件容易事, 基於入口管制問題某D食材即使有錢都未必可以買倒.

想煲西洋菜陳腎湯 - 難度係9.99呀!!! 難到在於西洋菜同陳腎.

不過真係好想飲呢款呢湯喎, 咁點好呢???  

西洋菜到夏天嘅時候可以自己係後園種, 冬天嘅時候偶然可以係中超買到空運西洋菜, 又或者可以選擇係英超買嘅西洋菜苗.

咁陳腎有點算好呢??? 可以好肯定咁講畀大家知係中超係買唔倒呀! 西人超市就更加冇可能喇! 除非由香港偷雞寄嚟不過都唔係100個巴仙可以收到呀! 而且仲要負上昂貴嘅郵費添呀!!!

咁唯一可以嘅解決辦法就係自己醃製囉, 當然一定唔會醃製到好似買番嚟咁, 不過能夠做到有60個巴仙相似都好滿足喇.

準備材料 : 鴨腎 / 鹽 - 準備一個膠盒或玻璃樽嘅器皿

將鴨腎洗乾淨放係"筲箕"隔水 / 盡量隔走血水備用

膠盒低放入一層厚厚嘅鹽

然後放入鴨腎再鋪上一層鹽

鋪滿鹽後又放入另一層鴨腎再加入鹽

放入最後一層鴨腎後又鋪滿厚厚嘅一層鹽, 然後蓋上盒蓋擺入雪櫃大約五日嘅時間, 過左五日之後就將鴨腎清洗乾淨, 放入"筲箕"隔水然後就可以攞出花園吹風同曬太陽喇.

因為天氣涷每晚都要開個中央暖板幾粒鐘, 所以入夜後我就會擺D鴨腎係個暖板隔離, 日頭就擺鴨腎係花園吹風同曬太陽.

大約兩個星期就可做出理想嘅陳腎效果

亞太自製陳腎就完成左喇! 都有60個巴仙相似而且都有一陣陣嘅香味, 當然就冇生曬出嚟咁好嘅效果喇不過亞太我都好滿喇.

P.S. 自家製作陳腎嘅時間好短, 較適合嘅時間係由一月至四月份, 亞太仲有兩至三個禮拜可以搞搞震, 之後就要再等一段時間先至可以繼續自製陳腎, 家陣我已經製好50幾隻亞太陳腎, 唔知到月尾會係乜嘢成績呢???