老翻辣子炒蟹

中超番左一批新鮮蟹, 畀撥Boot豬見倒佢兩眼放光大叫媽媽我想食蟹呀!!!

我個寶貝女要食喎當然冇問題喇!!!

我買左兩隻蟹決定一蟹兩食>_<

我將蟹箝同部份蟹身 - 做薑蔥炒蟹畀小姐們食

其餘嘅蟹我決定做一個老翻辣子炒蟹畀狂躁先生慢慢歎, 由於我唔記得影相所以大家就想像下個烹煮過程, 下一次我再做呢個老翻餸嘅時候一定會將個過程影低.

材料 : 蟹 / 薑/ 蒜頭/ 洋蔥/ 莞荽/ 乾辣椒/ 花椒

調味料 : 糖 / 酒

醬料 : 辣豆瓣醬 / 麻辣醬

做法 : 蟹洗乾淨放入"筲簊"隔水 / 上一層薄嘅生粉落鑊炸蟹備用 / 起鑊落油爆薑片同原粒蒜頭 - (小心控制火力否則蒜頭好容易燶) 

當聞到一陣一陣薑片同蒜頭香味, 就落埋花椒 / 乾辣椒 / 洋蔥炒勻, 跟手就可以加入適量嘅麻辣醬同豆瓣醬炒勻然後落蟹.

落蟹後快手炒然後係鑊邊倒入大約50ml嘅酒蓋上鑊蓋大約焗一分鐘, 打開鑊蓋加入適量糖快手炒勻上碟, 上碟後擺小小莞荽做裝飾老翻辣子炒蟹就完成喇.

P.S. 由於辣豆瓣醬 / 麻辣醬本身已經係一個重味嘅醬料, 所以炒呢個餸我係冇落鹽因為狂躁之家向來嘅煮食都係偏淡, 大家可按個人嘅口味加減調味料份量.

狂躁先生品嚐後都大讚我老翻煮得同正板出嚟嘅效味道都幾似>_<