家鄉炆豆腐卜

狂躁亞太我呢係個客瓜人(客家), 所以我好中意食豆類食品, 今日就同大家分享一下我嘅家鄉炆豆腐卜.

材料 : 魚肉 / 菜脯 / 蔥 / 豆腐卜/ 蘿蔔 / 蝦米 / 薑 / 蒜頭

首先將魚肉剁爛(我選用龍俐魚柳肉), 魚解涷洗淨用廚房紙巾印乾水份剁爛至起膠, 將菜脯同蔥切碎加入魚膠放入大碗裡面順時針方向攪勻, 最後當然將魚膠大力撻幾下咁樣D魚膠就會好彈牙喇, 打好嘅魚膠放番入雪櫃儲存. (魚膠醃料 : 白胡椒粉, 麻油, 雞粉)

我個人中意即做即煮

從雪櫃攞出魚膠將豆腐卜對切一半, 釀入魚膠煎至金黃色.

魚膠煎好後另起鑊爆香薑片同蒜頭, 再放入蘿蔔條同蝦米炒勻, 從鑊邊加小小酒加入適量水蓋上鑊蓋中火炆, 當水炆到差不多嘅時候放入適量蠔油, 鹽, 雞粉, 砂糖炒勻, 再將魚膠豆腐卜加入收細火炆至收水到杰身最後加入小許麻油就完成.

狂躁靚太嘅家鄉炆豆腐卜