老翻辣子肥腸

好偶然我哋一家會約埋D親戚或好友去Sheffield逛個圈(一年都應該有一次吧)>_<

每次去我哋都會去一間大眾化嘅茶餐廳食飯, A餐, B餐, 常餐, 特餐, 火鍋, 小菜, 川菜等等, 能夠係大不列國搵到一間咁嘅大眾化茶餐廳, 我狂躁靚太只可以講平, 靚, 正.

每次去呢間餐廳狂躁先生必點辣子肥腸(係川菜), 而肥腸即係豬大腸雖然呢碟餸菜唔係我柸茶, 豬大腸喎我當然唔會食喇! 不過我見狂躁先生食得好滋味喎, 所以我決定老翻一碟畀狂躁先生食.

其實碟肥腸有D乜我係唔知呀! 我只知道有好多辣椒同莞茜係面, 所以我都係亂煮不過出嚟嘅效果, 狂躁先生竟然話比正板更好食更正.

我冇將每個煮嘅步驟影相, 下次再煮嘅時候我會記得每個步驟都影低同大家分享.

材料 : 豬大腸 / 鹹酸菜 / 中國芹菜 / 莞荽 / 薑 / 蒜頭 / 花椒 / 乾辣椒

醬料 : 麻辣醬 / 豆瓣醬 

首先將豬大腸清先出水備用 / 我將豬大腸解涷後用水洗淨, 落生粉同鹽再洗一次, 然後用薑同酒出水, 之後再煲一煲水加入胡椒粒同適量嘅鹽煲豬大腸至腍.

起鑊先爆薑片同蒜頭 / 再落花椒, 麻辣醬, 豆瓣醬 / 爆香料頭後就落鹹酸菜同乾辣椒炒勻 / 跟住就落豬大腸然後係鑊邊贊酒 / 最後加入中國芹菜快手炒起鑊前再落適量嘅糖同麻酒就可以上碟 / 由於醬料可能已經夠味加上豬大腸已經用鹽煲腍, 所以嚟到炒呢個步驟我唔會再落鹽.

呢個就係我狂躁靚太嘅老翻辣子肥腸喇