蜜糖雞翼

雞翼真係一種百食不厭嘅食品, 而且又有多種花款嘅煮法, 今日亞太又同大家分享一個又簡單又好味嘅蜜糖雞翼製法.

材料 : 雞翼 / 薑 / 蒜頭

醃料 : 鹽

調味料 : 酒 / 生抽 / 老抽 / 水 / 蜜糖

雞翼洗乾淨加入適量鹽醃 / 至少醃兩粒鐘

亞太有時間準備所以醃左半日

將鑊加熱放入適量薑片

唔洗加油落鑊先將雞鎚放入以中大火煎

由於雞鎚比較厚肉所以先將雞鎚放入煎

雞鎚煎至兩邊金黃色就可加入雞中翼繼續以中大火煎

將雞翼煎到八成熟備用

用一個碗加入適量嘅水/ 生抽 / 老抽 & 蜜糖

鑊加熱後放入適量薑片 & 蒜頭

同樣唔需要放入油加入煎至八成熟嘅雞翼落鑊

快手炒勻幾下係鑊邊灑入適量嘅酒

加入酒後再快手炒勻然後就倒入之前準備好嘅蜜糖水

加入蜜糖水炒勻幾下後就可蓋上鑊蓋

將蜜糖水以大火收汁至理想杰度

由於有蜜糖所以係收汁嘅同時需要耐唔耐打開鑊蓋將雞翼炒勻

簡單美味蜜糖雞翼就完成