我依然係Y記嘅狂躁靚太: 3月 2016

2016年3月28日星期一

晴天霹靂的結果

日期 : 2015年9月3號

亞太一整晚都瞓唔倒輾轉反側經過漫長一晚嘅煎熬, 亞太送完小公主同撥Boot豬番學之後, 就"拿拿淋"跑去買棒棒喇!!! 亞太買左兩個唔同牌子嘅棒棒, 買完就即刻揸車番屋企做測試.

為左安全起見亞太細心閱讀有關使用說明, 其實呢都係多此一舉因為有關嘅程序都係一樣, 既然毫無分別就無謂蹝時間, 亞太深呼吸一下就開始再做有關嘅程序, 好快就顯示測試結果, 兩枝棒棒都顯示同一個結果.

望見呢兩枝棒棒亞太真係欲哭無淚差D就暈係廁所, 呢個真係一個晴天霹靂嘅結果呀!!! 夠晒震撼亞太個心靈.

四枝棒棒都顯示同一個結果, 咁可信嘅程度又有幾多個巴仙呢??? 亞太個腦真係一片空白, 亞太需要時間去消化呢個晴天霹靂嘅結果.

亞太跟住攞新果兩枝棒棒結果畀狂躁先生睇, 我家大老爺睇完都O晒嘴!!! 狂躁先生話點解會咁呀??? 已經做足安全設施點解都跑出一個驚喜來??? 亞太我都想知道點解呀!!! 當時真係驚多過喜呀!!!

當時亞太嘅心情都好亂同複習, 不過都要積極去面對, 當時唯一可做嘅事就係搵專業人事確定亞太肚中係埋真係有個小生命.

嚇人結果

日期 : 2015年9月2號

瞓醒香甜一覺後亞太又回歸如常生活工作, 直到狂躁先生瞓醒梳洗後, 佢真係話要同亞太一齊去買棒棒驗下喎, 既然佢咁認真亞太又陪佢癲一次喇!!! 其實亞太唔想狂躁先生每晚都問同一個問題, 所以先至滿足狂躁先生嘅要求一齊去買棒棒乍... ...作死!!!

揸得車出去冇理由淨係走去買棒棒喇! 當然走去Market買埋當晚嘅餸菜, 跟住又走去中超, 西超上糧餉喇! 一逛又幾粒鐘咁就順便接埋兩位千金放學喇! 番到屋企狂躁先生不停催促亞太搵枝棒棒玩下.

亞太真係怕左狂躁先生所以即刻拆左個包裝攞左其中一枝棒棒走入廁所, 棒棒呢樣嘢亞太唔係第一次用程序要點樣做亞太當然記得, 程序完成後亞太睇住枝棒棒快速顯示結果係 : 只有一條線出現, [出現一條線表示係Negative冇懷孕], 當時亞太好開心即時開廁所門準備通知狂躁先生.

點知亞太一開門已經見到狂躁先生企係門口等結果, 亞太畀左枝棒棒狂躁先生自己睇, 當佢知道只得一條線出現心情當然同亞太一樣喇!!! 我倆係廁所擾攘一輪後亞太就好順手將枝棒棒揼入垃圾桶.

原本以為棒棒事件告一段落, 當晚仲享用左一餐美味嘅晚飯, 過左一個愉快嘅晚上, 直到瞓覺前又畀狂躁先生發現一件嚇人嘅事件, 話說當晚狂躁先生正準備刷牙洗臉瞓覺, 由於狂躁先生用完枝牙膏, 當佢揼枝牙膏落垃圾桶嘅同時, 竟然發現枝棒棒由原本嘅一條線變成兩條線, [出現兩條線即表示係Positive懷孕].

狂躁先生睇見竟然有兩條線當然係呱呱叫亞太喇, 亞太我當時睇見都頭暈暈, 究竟發生乜嘢事??? 兩個人4隻眼100個巴仙睇見只係一條線出現, 點解幾粒鐘之後竟然會變成兩條線.

亞太即時攞埋第2枝棒棒出嚟, 程序當然係一樣喇而且快速顯示結果, 但係今次嘅結果唔一樣呀!!! 係快速出現兩條線呀!!!

亞太睇見呢兩枝棒棒真係有得震冇得瞓喇!!! 同一盒棒棒竟然會出現一個咁嚇人嘅結果, 點解? 點解? 點解呀???

上面果枝棒棒出現嘅兩條線係比較淺色一D(係當日下晝測試嘅結果), 下面果枝棒棒就比較深色而且明顯(係當晚再測試嘅結果)!!!

忐忑心情

原本亞太唔係太上心在意有關仲未洗床單嘅問題??? 不過自此問題後一連好幾晚狂躁先生放工番屋企, 第一句同亞太講嘅說話就係"M小姐"探左妳未呀??? 真激死亞太做乜突然咁關心呢個問題啫!!!

狂躁先生一連問了好幾個晚上! 不過亞太嘅回答都係暫時仲未見"M小姐"出現喎, 係9月1號晚狂躁先生放工番屋企見到亞太, 當然又係果句例牌說話"M小姐"探左妳未呀??? 亞太當時都輕鬆回答: 未呀!!!

突然狂躁先生好認真咁同亞太講 : 聽日我放假睇嚟要一齊去買枝棒棒番嚟驗下喇!!! 當時亞太回應狂躁先生兩個字就係"痴線".

聽完狂躁先生話要去買棒棒亞太嘅心情突然好忐忑, 仲搞到亞太瞓唔著真係激死人, 瞓唔著自然就開始多多嘢諗, 一時就諗"M小姐"可能鬧情緒所以就遲左囉, 一時又諗亞太都好似冇乜點樣同狂躁先生Happy過, 但係點解"M小姐"又會遲左呢??? 滿腦子都係問號, 問號同問號???

亞太同狂躁先生都唔係18, 22血氣方剛嘅年輕人喇!!! 所以對Happy呢回事並唔係咁熱衷, 加上亞太同狂躁先生分房瞓已經有好幾年喇!!! 自撥Boot豬出世後狂躁先生就同小公主同房, 小龍B出世後狂躁先生又換左同撥Boot豬同房, 亞太當然因照顧小龍B所以一直同房至今喇!!!

亞太成日都話要正面態度面對問題!!! 所以到左清晨時份亞太突然"丁"一聲, 基於以上理由(一)當然係分房瞓, (二)好似冇乜Happy過{亞太冇記錯"M小姐"第四次探訪後狂躁先生只係同亞太Happy過2次}, {而最重要嘅要點係已經做足安全設施}, 所以命中率搞出人命嘅機會係零巴仙, "M小姐"遲左出現可能係基於生理時間上出錯.

忐忑嘅心情只係受到狂躁先生一時嘅影響, 亞太其實冇需要諗太多自己嚇自己, 所以突然間成個人鬆晒睡意即呼喚亞太, 問題諗通左所以亞太就可以瞓得好香甜喇>_<

亞太洗床單記

踏入中一下學年嘅時間某日亞太嘅另類親戚"大姨媽M小姐"就突然到訪, 自此之後"M小姐"都好準時咁每月嚟探訪亞太, 生理上嘅轉變都為亞太帶嚟一D唔方便, 最重要係額外加添亞太嘅工作, 因為"M小姐"每次探訪期間亞太都要洗床單, 真激CCCCCCCCCCCC... ... ...

偶然都會試過有一次半次唔需要洗床單, 不過"M小姐"探訪亞太超過20個年頭有多, 唔需要洗床單嘅次數真係一雙手嘅手指都夠數, 人家唔知以為亞太愛清潔係一個好勤力嘅人, 實情係另有原因乍>_<

唔知係亞太年紀大開始踏入中年, 定係"M小姐"佢鬧情緒又所不滿, 去年6至7月份兩個月內"M小姐"總共探左亞太四次, 大家冇睇錯係四次亞太都冇打錯係四次, 舊年五月份奶奶由香江嚟大不列顛探訪狂躁之家.

五月份"M小姐"探訪完亞太冇耐奶奶就到步狂躁之家, 所以五月份亞太洗床單嘅時候奶奶依然係香江, 六月初某日亞太又要洗床單喇, 只有兩個禮拜嘅時間亞太又再一次洗床單, 心水清嘅奶奶同亞太講 : 妳又洗床單妳好似兩個禮拜前先洗左喎???

亞太回應奶奶因為"M小姐"探訪所以又要洗床單囉, 奶奶仲笑亞太咁大個人仲咁鬼"論盡">_<, 奶奶係七月中嘅時間就番香江, 係奶奶上機前幾日亞太又要洗床單, 奶奶當時仲同亞太講 : 撞鬼囉又洗床單!!!

亞太回應奶奶可能就快收經喇! 所以"M小姐"米嚟到亂七八糟囉, (而且嚟得快就得快, 頭尾只有4日嘅時間), 奶奶話妳就想喇仲咁後生, 我話唔後生喇到左10月份亞太就40歲喇! 奶奶話應該唔會咁早收經, 我仲同奶奶講或者亞太我就係早果個呢!!! 接近七月尾"M小姐"就係兩個月內第四次探訪亞太喇.

"M小姐"兩個月內嚟探訪亞太四次應該都係一個紀錄, 亞太兩個月內先後洗左四次床單又係另一個紀錄, 洗床單事件完畢後亞太一如平常生活, 加上又踏入暑假小公主同撥Boot豬唔洗番學, 所有課餘嘅學習都休假中, 唔洗番學嘅日子只會令亞太生活更忙碌, 忙碌同忙碌.

臨近八月尾嘅時候狂躁先生突然同亞太講 : 老婆好似好耐冇見妳洗床單??? 以又係喎不過我回應狂躁先生, 可能"M小姐"之前嚟到亂七八糟2個月內探左亞太4次, 所以今個月遲左小小不過應該都差唔多時候喇! 亞太差唔多又要準備做洗床單嘅動作喇>_<

2016年3月27日星期日

家常便飯 @ 24/03/2016

是日狂躁之家的家常便飯 :

亞太貪方便所以用左手機影相, 效果當然冇咁好喇!!!

蒜片西蘭花

青蒸拖拔魚

一雞兩食 - 醉雞 & 白切雞

薑蔥龍蝦

仲有亞太靚湯 - 紅蘿蔔合掌瓜蜜棗煲豬骨湯, 不過亞太唔記得影相>_<

朱古力 @ 2016 (6)

又嚟! 又嚟! 狂躁姊弟團又收朱古力, 雖然今次唔係收朱古力蛋, 不過依然係充滿復活節氣氛嘅朱古力.

呢3枝可愛嘅朱古力係Y太太送畀狂躁姊弟團

今年狂躁姊弟團總共收到15隻朱古力蛋 & 3枝可愛朱古力

而亞太今年都送左唔小朱古蛋做回禮>_<

朱古力蛋 @ 2016 (5)

狂躁姊弟團 - 又收朱古力蛋喇>_<

呢3隻朱古力蛋係Auntie Ling Ling送畀狂躁姊弟團

家陣屋企已經有15隻朱古力蛋喇

2016年3月16日星期三

家常便飯 @ 15/03/2016

是日狂躁之家的家常便飯 :

煎雞蛋

蒸臘腸&膶腸

蒸魚

油鹽水焯菠菜

是日亞太精神不佳, 所以連餸菜都不佳>_<

2016年3月15日星期二

家常便飯 @ 14/03/2016

是日狂躁之家的家常便飯 :

黑椒火腿意粉

火腿意粉

蒜蓉包

海鹽黑椒焗排骨

家常便飯 @ 13/03/2016

是日狂躁之家的家常便飯 :

煎蠔餅

西蘭花炒魚片

叉燒

煎豆腐

仲有一煲蕃茄豆腐魚湯不過唔記得影完成品>_<

豆腐蕃茄魚湯

材料 : 魚 / 蕃茄 / 豆腐 / 紅蘿蔔 / 薑 / 黃豆

魚洗乾淨放入筲簊隔水

加入適量鹽醃一粒鐘

黃豆洗乾淨放入大碗內加入熱水浸泡

蕃茄 / 豆腐 / 紅蘿蔔洗乾淨切件

鑊加入油放入薑片加熱

將魚煎至兩邊金黃色

先將黃豆煲半粒鐘

將煎好嘅魚放入以大火煲滾嘅黃豆水裡面

再將其餘材料加入以大火煲一粒鐘

一粒鐘後就可享用一碗奶白色嘅靚湯, 可惜亞太顧住飲湯唔記得影相. 哈哈!!!

2016年3月13日星期日

我家小龍B

亞太今日係第一次係個Blog到寫有關小龍B嘅事, 因為時間有限生活忙碌亞太都冇機會係病虎年代Blog同大家分享小龍B嘅事, 今日亞太正式同大家分享小龍B嘅事唔知遲唔遲呢???

2012年9月份嘅某日亞太就生左小龍B!!! 眨眨眼原來小龍B已經三歲多喇!!! 再過多個零月小猴B出世後, 小龍B就升呢做哥哥喇!!! 唔知小龍B會唔會呷小猴B醋呢???

言歸正傳講番亞太個小龍B先, 小龍B係奶奶第一個男孫, 奶奶總共有七個孫暫時只有小龍B係男孫, 上一輩子嘅老人家總希望家中有一, 二丁男孩, 奶奶本身有三個"好字", 因為生左三個女三個仔, 家陣亞太都為夫家添了一個男孩都算有所交代喇!!! >_<

亞太個人對生仔生女都冇所謂, 最重要係四肢健全身體健康, 加上大家都知喇生小朋友唔到自己控制冇得強求呀!!! 仔女呢家嘢都好講求緣份, 不過亞太都好感謝老天爺賜予一個勁抵錫嘅小龍B到狂躁之家, 小龍B自出院回家後都係一個勁抵鍚嘅小寶寶, 好小大叫大喊即使彆肚餓或想換片片, 都只係細喊幾聲食飽就瞓瞓飽又食.

偶然唔瞓覺亦唔會彆抱乖乖瞓係床仔聽下音樂望下天花自我享樂, 狂躁先生話唔出聲唔會有人知道家中添了個小寶寶, 梗係喇小龍B真係好乖巧, 所以狂躁先生晚晚都可以大覺瞓囉, 對比起湊小公主同湊小龍B簡直有天壤之別.

小龍B身體健康都唔錯呀可能因為飲母乳關係, 小龍B第一次生病係係七個多月大嘅時候, 三歲多嘅小龍B係一個樂天活潑嘅寶寶成日都笑臉迎人, 不過見到陌生人或唔係常見嘅親戚朋友就會好怕醜, 雖然係個小男孩不過成日都同撥Boot豬爭寵, 亦都"好嗲"亞太我同狂躁先生, 整體嚟講呢小龍B暫時都係一個超級抵錫嘅小寶寶>_<

我家撥Boot豬

亞太嘅心肝撥Boot豬眨下眼就已經五歲多喇!!! 湊撥Boot豬真係攞左亞太半條老命, 如果有睇病虎年代亞太Blog嘅人都知, 撥Boot豬係滿月後就確診患有超級嚴重濕疹&食物過敏症, 頭兩年亞太湊住撥Boot豬出出入入醫院無數次, 各大小專科Booking排到滿滿, 曾經試過唔夠24小時要跑三個唔同地方嘅Booking.

亞太覺得湊撥Boot豬比起要同一時間照顧一孖胎BB更辛苦, 頭兩年真係好吃力加上撥Boot豬嘅過敏性濕疹, 亞太就要格外小心照顧仲要特別留意飲食方面, 撥Boot豬一歲多嘅時候亞太又發現懷有小龍B, 記得有次陀住小龍B挺著肚子揸車去Sheffield大醫院同撥Boot豬睇專科, 搞足一日又要驗呢樣驗果樣走嘅時候發現自己同撥Boot豬係最遲走嘅人, 係米好誇張同嚇人呢足足一整天留係過敏症專科???

其實當時亞太心頭嘅滋味真係好難受, 難受唔係因為亞太嫌麻煩辛苦, 作為亞娘嘅我早有心理準備為自己嘅兒女一世奔波勞碌, 亞太只係心痛肉亦年紀小小嘅撥Boot豬就遇上咁多健康麻煩, 果刻亞太眼淚只可向心裡流.

一刻情緒低落過後亞太又以光速回歸正確正面心態面對, 預期怨天尤人嘈嘈閉倒不如積極正面面對, 相比起某D小朋友一出世就要瞓醫院, 全身插滿針藥接駁各種儀器, 感恩我家撥Boot豬真係小巫見大巫喇!!!

亞太過去嘅辛苦努力都算冇白費, 雖然今天撥Boot豬依舊患有以上病症, 但相比起病症初期已經進步改善左好多, 濕疹係一場長久戰需要花上多年時間對抗, 而撥Boot豬所患嘅係過敏性濕疹所以就需要花更多時間同彈藥對抗呢場長久戰, 亞太擇日會再出有關濕疹嘅Topic同大家分享.

五歲多嘅撥Boot豬家陣讀梗"Reception", 係一名可愛活潑嘅友誼小姐, 不過就好鬼為食係家中嘅小老鼠成日都偷食, 不過又食極都唔長肉真係激C人, 撥Boot豬同小公主相處都算溶合不過偶然都會頂嘴, 但就好愛鍚小龍B五歲多依然"好嗲"亞太我同狂躁先生, 成日都要我倆人抱抱同錫錫.

由於撥Boot豬健康比較差又容易覺得攰所以除左學校生活之外, 撥Boot豬只有學跳舞一樣嘅課餘學習, 不過最近呢個小鬼頭同亞太講想學鋼琴, 我同撥Boot豬講學鋼琴都係一個唔錯嘅課餘學習, 不過呢一刻有D難等小猴B出世後, 亞太就會係時間上作出適當嘅安排.

撥Boot豬聽完亞太講就笑住回應 : 好呀!!! 我知媽媽妳肚肚有個BB, 就等BB出世後我先至學鋼琴呀!!! 呢個小鬼頭真係善解人意雖偶有小脾氣, 不過都算係一個抵人愛鍚嘅可愛小天使.

我家小公主

亞太好耐都冇係個Blog到講下我深愛嘅寶寶喇!!! 等亞太今日同大家Update下喇, 不過唔Update都唔知原來時間真係過得好快呀!!! 所以大家真係要好好珍惜呀>_<

初初係病虎年代寫Blog同大家分享嘅時候, 我家小公主只有三歲多, 今日我家小公主已經九歲多喇家陣小公主讀梗"Year 4", 年尾將會踏入10歲嘅小公主, 學業成績都算不錯有D小聰明, 除左學校嘅生活之外, 小公主有學跳舞, 學拉小提琴, 參加小女童軍同番中文學校生活都相當充實, 亞太唔係要做怪獸家長呀!!! 以上嘅課餘學習係小公主自己要求呀!!!

至於性格方面當然仲有改善嘅空間, 因為小公主由細開始都有D小姐脾氣, 加上逐漸長大有自己嘅思想判斷, 有時都會駁嘴唔聽亞太枝笛呀!!! 亞太都知道冇十全十美嘅事, 唯有再畀時間好好教導小公主, 令我家大小姐有更多進步改善嘅空間.

2016年3月12日星期六

家常便飯 @ 11/03/2016

是日狂躁之家的家常便飯 :

雲耳魷魚炒蘆筍

麵醬酸梅蒸排骨

青蒸和尚魚

朱古力蛋 @ 2016 (4)

又嚟! 又嚟! 狂躁姊弟團又收到朱古力蛋喇!!!

以下呢三隻朱古力蛋係"Auntie S"送嘅

家陣總共收到12隻朱古力蛋!!!

亞太真係冇眼睇喇>_<

2016年3月11日星期五

感恩的21個寒冬

今日係亞太同狂躁先生攜手並肩共度21個寒冬嘅大日子.

冇錯係21個寒冬, 21個寒冬話長唔長, 話短亦唔算短, 早年三色台熱爆劇集男主角柴先生係劇中金句人生有幾多個10年??? 冇錯人生究竟有幾多個10年呢??? 答案可以好肯定同大家講冇人能夠預知預計.

所以亞太能夠同狂躁先生擁有2個十年真係感恩滿足到不得了, 當然係21個寒冬裡面我倆曾經經歷過好多高低煩惱意見不一嘅事, 當然亦有甜蜜愉快數之不盡嘅事, 人生就係咁有苦有甜有喜有悲, 亞太個人覺得婚姻係一門好高深無了期嘅學習, 要兩個不同性格生活不一嘅人牽在一起已經唔係一件易事, 當中仲會牽涉其他因數.

想擁有一段長久美滿嘅婚姻, 其實唔係得個"講"字就可以做到, 首要條件梗係兩人要彼此相愛, 要有共同嘅決心去維繫, 愛護, 珍惜呢段得來不易嘅婚姻, 大男人主義, 老虎乸式嘅相處就只有死路一條, 其實婚姻係相輔相成嘅缺少一方都唔能夠成事.

亞太都係果句喇婚姻係一門好高深嘅學習, 要花上終身嘅時間精神去學習, 維繫, 愛護同珍惜, 要有好嘅收成絕對唔係三言兩語一朝半天可以做到, 亞太慶幸搵到狂躁先生呢個愛侶, 我倆好清楚知道大家想共同擁有一段收成美滿幸福而長久嘅婚姻.

即使當中經歷遇過種種嘅高低煩惱意見不一嘅事, 最後我倆都能夠攜手並肩將問題迎刃而解, 只要大家彼此相愛, 以積極正面嘅態度去學習, 維繫, 愛護同珍惜, 相信已經播下最好嘅種子去耕種一段長久美滿嘅婚姻.

今日亞太同狂躁先生化身為農夫, 係烈日當空日曬雨淋或狂風暴雨下, 我倆暫不問收成只希望係往後嘅日子能夠繼續攜手並肩努力耕耘, 我同狂躁先生都認為今日就講收成真係言之過早, 不過亞太個人認為只要我同狂躁先生有共同嘅目標理念, 以積極正面嘅態度去學習, 維繫, 愛護同珍惜, 相信我倆已經贏了一份信心去耕種呢段長久美滿嘅婚姻.

能否有美滿嘅收成結果, 亞太同狂躁先生都會耐心拭目以待, 不過亞太就非常感恩今日能夠擁有21個寒冬嘅時光, 雖然我倆一如平常嘅生活, 冇特別嘅慶祝禮物等等, 但我倆內心都充滿喜悅歡欣, 不竟21個寒冬真係得來不易, 能夠攜手並肩21個寒冬我倆都唔著重慶祝禮物等閒事, 加上我倆已經不再係18, 22嘅年輕人.

只要大家都彼此相愛一同努力為呢段婚姻呢個家去學習, 維繫, 愛護同珍惜, 只要雙方都堅持呢個共同目標理念, 已經勝過任何禮物同燭光晚餐, 亞太感恩今日有機會同大家分享呢個得來不易嘅21個寒冬歡欣時光, 亞太係往後嘅日子會繼續努力活在當下好好珍惜做好亞太嘅工作同責任.

21個寒冬嘅時光真係得來不易, 所以亞太都借呢個機會高呼 : 狂躁先生亞太永遠都愛你>_<