我依然係Y記嘅狂躁靚太: 2月 2016

2016年2月29日星期一

2016年2月28日星期日

2016年2月26日星期五

究竟亞太嘅生活工作有幾忙碌, 忙碌同忙碌呢??? 今日就等亞太帶大家睇下亞太張生活時間表喇!!!

07:50 - 亞太起身梳洗
08:00 - 叫醒小公主同撥Boot豬梳先 / 同時為兩位小姐準備早餐
08:20 - 小公主同撥Boot豬早餐時間
08:50 - 揸車送小公主同撥Boot豬番學
09:15 - 番屋企繼續陪"小龍B"瞓覺
11:00 - 起身同"小龍B"梳洗準備送狂躁先生番工
11:30 - 揸車送狂躁先生番工
12:15 - 送完狂躁先生番工, 番屋企準備早午餐畀"小龍B"食 / "小龍B"食飽後就到亞太開餐, 晏就呢餐亞太食得好簡單, 通常都係食番之前一晚嘅飯餸.
13:00 to 15:00 - 如果係Market Day亞太就會去Market買餸 / 如果唔係Market Day就會留係屋企做日常家務洗衫晾衫, 吸塵, 煲湯等等.
15:05 - 揸車接兩位小姐放學
15:30 - 番到屋企為兩位小姐同小龍B準備茶點
16:30 - 小姐們功課時間
18:00 - 準備晚餐
18:45 - 同撥Boot豬, 小龍B洗頭沖涼
19:00 - 煮飯時間
20:00 - 晚餐時間
21:00 - 晚餐用膳完畢收拾洗碗筷等工作
21:00 to 21:45 - 兩位小姐娛樂同享用生果嘅時間
21:46 - 兩位小姐開始梳洗換衫22:00準時熄燈瞓覺
22:30 - 亞太要做陪瞓因為亞太先要陪小龍B瞓覺
23:00 - 小龍B瞓左就係亞太真正工作時間通常就要掃地拖地, 為狂躁先生準備晚餐
00:00 - 狂躁先生收工番嚟沖涼之後就享用晚餐, 亞太趁狂躁先生享用晚餐就會去沖涼, 等狂躁先生食飽又洗碗筷, 仲有摺衫, 或其他屋企濕碎等等工作... ...

以上係大致嘅日常生活時間表

每個星期二係撥Boot豬學跳舞 - 16:00 to 16:45

每個星期三係小公主學跳舞 - 17:15 to 18:50

每個星期五係小公主女童軍 - 18:00 to 19:30

每個星期日係小公主番中文學校 - 11:00 to 13:00

有時係平日亞太都要為屋企加添糧餉, 不過大多數會安排係星期六同星期日呢兩日搞點

亞太因為要幫補家計所以會幫D餐館做蛋糕甜品, 亞太仲會幫忙做保母湊小朋友添, 由舊年四月份開始仲有一個小朋友係亞太嘅長期客戶, 平均亞太都要湊呢個小朋友5日嘅時間.

如有突發時件例如我家小姐們, 小爺唔舒服亞太就會更忙碌, 忙碌同忙碌.

亞太其實都真係幾忙呀! 平均每晚02:30就真係可以休息瞓覺喇>_<

亞太近況

哈哈!!! 亞太係2015年又消失左一段幾長嘅日子, 成日都同自己講唔好再潛水盡量抽時間紀錄自己生活點滴, 等他日亞太有老人癡呆嘅時候睇番個Blog都有D回憶, 不過亞太真係多多時間都唔夠用, 亞太日常生活嘅工作比起狂躁先生更忙碌, 忙碌同忙碌.

莫講話要寫Blog有時真係連瞓覺嘅時間都唔夠呀!!! 如果有睇開亞太個Blog嘅朋友都知道, 係病虎嘅年代亞太只係Update到我家二小姐"撥Boot豬"嘅生活逸事, 亞太成日都想同大家分享我懷有"小龍B"嘅事, 可惜亞太每日嘅工作真係忙得要命, 所以真係冇可能日日都乖乖去Update.

哈哈! 亞太呢排都懶勤力咁去Update個Blog, 不過可能有一日又再次潛水消失, 以前睇開亞太嘅Blog友仔都消失晒喇! 家陣只有好幾個朋友會巡下亞太個Blog, 不過冇緊要亞太寫Blog都係個人嘅興趣, 同埋係想記錄生活點滴他日作個回憶紀念.

亞太係嚟梗嘅日子會將過往嘅生活逸事逐一紀錄做個回憶, 不過真係有排寫番晒出嚟呀! 小公主家陣已經九歲多, 撥Boot豬五歲多, "小龍B"都三歲四個月大, 亞太今日公佈肚子裡仲有一個"小猴B", 睇嚟真係寫到去60歲都未寫番晒之前嘅生活逸事>_<.

家常便飯 @ 24/02/2016

亞太呢排腦閉塞又冇乜煮意慾所以食得超簡單, 好彩我家老板狂躁先生冇"乍形">_<

是日狂躁之家的家常便飯 :

炒麵加腐皮雞絲粥

脫??? 不脫???

呢期大不列顛嘅大熱新聞, 當然係有關6月份嘅公投係米應該脫歐???

哈哈!!! 亞太今日又同大家吹下新聞時事先, 亞太當然知道脫唔脫歐唔係我呢個煮飯婆嘅能力範疇, 不過都係果句喇純粹係講下個人感受, 而唔係要得到大家嘅認同, 不過如果問我嘅話亞太係支持脫歐, 大不列顛雖然係歐盟會員國之一, 但其實睇真D所有嘢都係獨立嘅, 無論係貨幣, 經濟, 金融, 管轄, 決策等等.

既然所有嘢都係獨立咁點解仲要多此一舉成為歐盟會員國之一呢??? 一日係歐盟會員國之一, 有關歐盟嘅問題大不列顛都走唔甩, 簡單講句今日所見嘅大量難民湧現問題, 一日係歐盟會員國之一米乖乖繼續支付龐大銀兩囉.

講得難聽一D大不列顛嘅經濟大家都有目共睹自身難保, 大量有關嘅福利都不段削減, 削減同削減, 某部份嘅大不列顛人都感受到生活壓力苦不堪言, 英鎊匯率就跌倒新低紀錄真係慘不忍睹呀!!!

亞太寫呢個Topic純粹係講下個人感受, 當然亦知道脫或不脫當中會有好多利弊關係, 乜都做唔倒嘅亞太只能衷心祝願天佑大不列顛.

2016年2月24日星期三

家常便飯 @ 23/02/2016

是日狂躁之家的家常便飯 :

煎雞蛋

豬肉蒸銀魚乾

青瓜菇菇炒魚片

青蒸紅斑魚

2016年2月23日星期二

家常便飯 @ 19/02/2016

是日狂躁之家的家常便飯 :

冬菇魷魚蒸肉餅

油鹽水焯菜芯苗

豆豉鹹酸菜燜魚

家常便飯 @16/02/2016

是日狂躁之家的家常便飯 :

蒜蓉牛油煎雞翼

蒜蓉炒青瓜

冬菇冬菜蒸和尚魚

2016年2月16日星期二

家常便飯 @ 15/02/2016

是日狂躁之家的家常便飯 :

煎豬扒

蒜蓉麵鼓醬蒸黃花魚

油鹽水焯菜芯苗

蘿蔔雲耳煮素鮑魚

2016年2月14日星期日

人日&情人節快樂@2016

亞太祝各位親朋好友人日&情人節快樂>_<

面是別人給的, 架是自己丟的

亞太我係香江生活接近30個年頭, 香江係亞太成長嘅地方, 亞太曾經係香江接受填鴨式嘅教育, 畢業冇耐就見證97金融風暴而失業, 如果要繼續講過往嘅經歷見證真係有排講都講唔完, 亞太只想強調對香江呢個地方有一份濃厚而獨特嘅感情, 亞太雖然因為狂躁先生嘅工作關係而生活係大不列顛, 但係亞太依然關心留意我成長嘅地方 - 香江.

不過今日嘅香江真係令亞太有D心酸, 大家可能會覺得亞太只係煮飯婆一名, 都係適合煮飯分享一下烹煮心得米算囉講乜鬼時事呀!!! 冇錯亞太雖然係煮飯婆一名不過都想分享一下內心對今日香江嘅個人感受, 原本應該開心歡送羊年迎接猴年, 點知就上演一場世紀超級大龍鳳, 亞太唔會去評論事件中邊個啱邊個錯, 因為每個人所企嘅位置都唔同, 所睇嘅觀點角度都唔一樣, 最重要係大家心中都有自己嘅一把尺去量度, 所以冇一定嘅啱同一定嘅錯, 永遠都唔會有一個標準而令人滿意認同嘅答案.

冰封三尺非一日之寒, 一次又一次上演嘅世紀超級大龍鳳連國際頭條新聞都上埋, 呢場世紀超級大龍鳳真係為一串魚蛋而引起??? 背後有冇其他嘅原因動機??? 有冇政棍借勢耍手段搞事??? 有冇牽涉政治因數??? 亞太都係果句說話我唔會去評論, 就等大家用雪亮嘅眼睛, 用不偏不倚嘅立場去分析同判斷.

不過亞太只想講句公道話(純粹係亞太個人睇法), 首先撇除果班有冇牌照問題嘅小販, 果班為工作而執勤嘅食環署人員, 仲有一班一直都得唔倒市民讚賞, 但仍然默默為香江維持治安法治嘅警務人員, 其實以上三方面人士都係為生活而工作啫, (簡單講句即係為搵兩餐食), 大家都要供養父母兒女有自己嘅家庭為生活而勞碌工作, 真係因為一串魚蛋而演變呢場世紀超級大龍鳳??? 亞太個人認為最無辜就係以上所提及嘅三方面人士, 原本只係路人甲, 乙, 丙嘅"茄呢啡", 突然升呢做左呢場世界超級大龍鳳嘅主角.

無能嘅政府丁點成績都做唔倒出嚟而且每況愈下, 市民生活艱苦對政府失望有所不滿呢方面絕對可以理解, 大家當然有言論自由亦有權去表達不滿, 不過係用一個和平理智嘅表達方式, 並唔係演變呢場所謂暴民嘅世紀超級大龍鳳, 即使政府丁點好成績都做唔倒出嚟, 贏唔倒大眾市民嘅支持, 但係香江始終係法治之區, 作為香江市民大家好應該遵守最基本嘅法治精神.

要香江社會和諧安定繁榮, 大眾市民安居樂業, 生活環境舒適理想, 當然唔係三言兩語一朝半天就可以將問題解決, 當然亦唔係亞太呢個煮飯婆嘅能力範疇事, 不過亞太真心希望政府藉著呢場世紀超級大龍鳳好好反思, 要積極正視解決問題嘅根源, 否則只會有更多沒完沒了嘅世紀超級大龍鳳出現, 俗語有句話面是別人給的, 架是自己丟的, 作為香江人嘅亞太亦都唔想再次見到丟架事而再次出現係國際頭條新聞.

亞太寫呢個Topic純粹係舒發個人內心感受, 而唔係想製造任何分歧爭拗或要得到大家嘅認同, 狂躁亞太絕對尊重言論自由.